ரஜினி, கமலுடன் பணியாற்றிய பிரபல சண்டைப்பயிற்சியாளர் ஜூடோ ரத்னம் காலமானார். அவருக்கு வயது 93.
70 மற்றும் 80-களில் வெளியான தமிழ் சினிமாவில் ரஜினிகாந்த், கமல்ஹாசன் என பலருக்கும் சண்டைப்பயிற்சி கற்றுக்கொடுத்தவர் ஜூடோ கே.கே.ரத்னம். இவர் 1500 படங்களுக்கு மேல் சண்டைப்பயிற்சி இயக்குநராக பணியாற்றியிருக்கிறார். இதில் ரஜினியின் 46 படங்களுக்கு ஜூடோ ரத்னம்தான் சண்டை இயக்குநராக இருந்திருக்கிறார்.
‘தாமரைக்குளம்’, ‘கொஞ்சும் குமரி’, ‘போக்கிரி ராஜா’, ‘தலைநகரம்’ ஆகிய படங்களில் நடித்தும் இருக்கிறார். 2019-ம் ஆண்டு தமிழக அரசின் கலைமாமணி விருதையும் ஜூடோ ரத்னம் பெற்றிருக்கிறார்.
இந்நிலையில் இன்று ஜூடோ ரத்னம் உடல்நலக்குறைவால் அவரது சொந்த ஊரான குடியாத்தத்தில் காலமானார். ஜூடோ ரத்னம் மறைவுக்கு திரையுலகினர் பலரும் இரங்கல் தெரிவித்து வருகின்றனர்.
அவரது உடல் சென்னை கொண்டு வரப்பட்டு ஸ்டண்ட் யூனியன் சங்க அலுவலகத்தில் அஞ்சலிக்காக வைக்கப்படும் என தெரிவிக்கப்பட்டுள்ளது.